Mańǵystaý oblysy ákimdiginiń bastamasymen uıymdastyrylǵan saıystyń maqsaty – aıtys óneriniń damýyna memlekettik deńgeıde qoldaý kórsetý, elimizdiń táýelsizdik jyldarynda qol jetkizgen qundylyqtaryn, óńirde júzege asyrylyp jatqan jasampaz jobalardy dáripteý, Mańǵystaý aıtys mektebiniń shyǵarmashylyq áleýetin nasıhattaý.
- Abyl men Nurym, Qashaǵan men Sáttiǵuldaı sóz zergerlerin týdyrǵan Mańǵystaý topyraǵynda, kóneden jetken bekzat óner, sýyryp salmalyq-ımprovızatorlyq shyǵarmashylyqtyń bıik shyńy – aıtystyń shabysy qaıta jańǵyrdy. Aıtys – bet jyrtysyp, jaýaptasý emes, saıasattan ada, ordaly Oıy, suńǵyla Sózimen tyńdarmannyń kóńil túkpirine oı salyp, zamana sazyn tolǵap, eldikke, yntymaqqa úndeý! Halyq jazýshysy Ábish Kekilbaıulynyń sózimen aıtar bolsaq: «Bıik talǵamdy tek salıhaly óner, salaýatty sýretker ǵana ósiredi. Bıik talǵamsyz bıik parasat joq. Al bıik parasat úlken jaýapkershilik. Búgingi úlken ózgerister onsyz júzege asa almaıdy. Rýhanı bedersizdik saıası táýelsizdikti de tárk etedi». Sebebi, sana ózgermeı, sapa ózgermeıdi. Sondyqtan aqyndarymyz «Rýhanı jańǵyrý» uǵymyn tereńnen taldap, osy uǵym aıasyndaǵy otansúıgishtik, Táýelsiz elimizdiń jetistikterin jan-jaqty jyrlaı bilýleri kerek. Sóz qadiri tómendemeı, búgingi aıtystyń dúbiri dúnıeni sharlasyn, tyńdaýshynyń qulaq quryshyn qandyrsyn! Merekemiz qutty bolsyn! - dedi aımaq basshysy Eraly Toǵjanov.
Jyr báıgesine óńirdiń ár túkpirinen 16 aqyn qatysýda. Olardyń qatarynda Mels Qosymbaev, Muhtar Nııazov, Rústem Qaıyrtaıuly, Ásem Erejeqyzy, Jansaıa Mýsına, Shalqarbaı Izbasarov, Qazyret Berdihan, Aspanbek Shuǵataev, Maqsat Ahanov, Ershat Qaıboldın, Shuǵaıyp Sezimhanuly, Janar Aılashova, Farhad Musaev, Abaı Jolmaǵanbetov, Altynbek Súıinbekuly, Azamat Orynbasarov syndy aqyndar bar.
Sulý sózdiń keremetin kórsetip, óleń qumar qaýymnyń shólin qandyrǵan dodada aıtyskerlerdiń ot aýyzdylyǵy, ótkirligi, sheshendiligi baǵalanbaq. Olardy saraptap, tórelik etetin qazylar alqasynyń músheleri de osal emes. Qazylar quramynda jazýshy, kınodramatýrg, Jazýshylar Odaǵynyń hatshysy Smaǵul Elýbaev, Qazaqstan Jazýshylar Odaǵy men Qazaqstan Jýrnalıster Odaǵynyń múshesi, Qazaqstan Respýblıkasy Prezıdentiniń buqaralyq aqparat quraldary salasyndaǵy syılyǵynyń laýreaty Namazaly Omashev, QR halyq aqyny, QR mádenıet salasynyń úzdigi Ásııa Berkenova, Qazaqstan Jazýshylar odaǵynyń múshesi, Halyqaralyq «Alash» syılyǵynyń jáne Qazaqstan Respýblıkasynyń Memlekettik syılyǵyn ıegeri Nesipbek Aıt, QR Jazýshylar odaǵynyń múshesi Svetqalı Nurjan bar.
Sondaı-aq, shara aıasynda «Elbasy jáne rýhy jańǵyrǵan Mańǵystaý» dep atalatyn fotokórme ótti. Kórmege 100-ge jýyq sýretter qoıylǵan. Mańǵystaý oblysynyń ákimi Eraly Toǵjanov arnaıy baryp, Elbasynyń óńirimizdegi sapary barysyndaǵy sýretter men aımaqta ótken tarıhı sharalardyń kórinisin tamashalady.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
